കൊറോണപ്പനി: വേണ്ടത് ലഘൂകരണമോ അടിച്ചമര്‍ത്തലോ?

Coronavirus - Mitigation or Containment startegy? Which is best in Kerala. A response to Ramesh Chennithala

കൊറോണക്കാലത്ത് അബദ്ധജടിലമായ വാദങ്ങൾ പല ദിക്കിൽ നിന്ന് ഉയരുകയും വൈറസിനെക്കാളും വേഗത്തിൽ പടരുകയും ചെയ്യുകയാണ്. ഒരു വർഷം മുൻപ് ഇറങ്ങിയ ഡെറ്റോൾ കുപ്പിയിൽ കൊറോണവൈറസിനെ കുറിച്ചു പറഞ്ഞിരുന്നു എന്ന് ഇക്കിളി ക്ലിക്‍ ബയ്റ്റ് അടിച്ച് വിട്ടത് കേരളത്തിലെ ഒരു മുൻനിര മാധ്യമമാണ്. പൊങ്കാലയിടുന്നയിടത്ത് വൈറസ് വരില്ല എന്നു പറഞ്ഞത് ഒരു മുൻ ഡിജിപി, മുപ്പതു ഡിഗ്രി സെല്‍ഷ്യസ് ഉണ്ടെങ്കിൽ കുഴപ്പമില്ല എന്ന് മറ്റൊരു ജനപ്രതിനിധി.

എന്നാലും ഇതിനേക്കാളൊക്കെ കുഴപ്പം പിടിച്ച പ്രസ്താവന ബഹുമാനപ്പെട്ട പ്രതിപക്ഷനേതാവിന്റേതാണ്. കാര്യം സഭയിലെ കൂവൽ പ്രശ്നത്തിൽ മുങ്ങിപ്പോയെങ്കിലും, എങ്ങനെ ഫലപ്രദമായി കോവിഡ്-19 നേരിടാം എന്ന വിഷയത്തിൽ അദ്ദേഹം സഭയിൽ നടത്തിയ പ്രസംഗത്തിൽ ചില ഗുരുതരപിഴവുകൾ ഉണ്ട്. പ്രത്യേകിച്ചും അവ രാഷ്ട്രീയാരോപണങ്ങൾ അല്ലാത്തതിനാലും പകരം നയപരമായ കാര്യങ്ങളായതു കൊണ്ടും അവഗണിക്കാൻ കഴിയാത്തവയാണ്.

അദ്ദേഹത്തിന്റെ വാദം ഇപ്രകാരം ആണ്, ഏതോ പ്രശസ്ത ID സ്പെഷ്യലിസ്റ്റ് രാത്രി ഫോൺ വിളിച്ച് പറഞ്ഞു, കേരളത്തിൽ കൊറോണ വൈറസിന് എതിരെയുള്ള പ്രതിരോധപ്രവർത്തനങ്ങൾ ശരിയായ രീതിയിൽ അല്ല. കോവിഡ്-19 നേരിടാൻ അമേരിക്ക ഉൾപ്പെടെയുള്ള വികസിതരാജ്യങ്ങൾ മറ്റും വിജയകരമായി നടപ്പിലാക്കുന്ന ലഘൂകരണതന്ത്രമാണ് (mitigation strategy) നല്ലത്, അടിച്ചമര്‍ത്തല്‍ (containment) അല്ല എന്ന്. കാരണം വൈറസിനെ തുടച്ചു നീക്കാൻ കഴിയില്ല. അതൊരു ഫ്ലു പോലെ സമൂഹത്തിൽ നിലനില്‍ക്കും, മരണനിരക്ക് 2-3 ശതമാനമാണ്‌. രാജ്യത്തിന്റെ സമ്പദ്‌വ്യവസ്ഥയ്ക്ക് വലിയ ആഘാതം ആകാവുന്ന "lockdown' ഒഴിവാക്കി ഹോം ക്വോറന്റയ്ൻ, അസുഖം മൂർച്ഛിക്കുന്നവരെ മാത്രം ചികിത്സിക്കുക എന്ന ഒരു രീതിയിലേക്ക് മാറുക. ഈ കൊറോണകാലത്ത് കേട്ട ഏറ്റവും അപകടം പിടിച്ച അഭിപ്രായം ആണിത്.

പ്രതിപക്ഷത്തിനോട് അല്പം കൂടി അൺഫ്രണ്ട്ലിയായ ഒരു പ്രസ്സ് ആയിരുന്നെങ്കിൽ ഇങ്ങനെ ഒരു തലകെട്ട്‌ അടിക്കും "കൊറോണയ്ക്ക് വലിയ നടപടികൾ വേണ്ട, ഒരു 4-5 ലക്ഷം ആളുകൾ മരിക്കട്ടെ, എന്ന് സഭയിൽ പ്രതിപക്ഷ നേതാവ്". 4-5 ലക്ഷം എന്ന സംഖ്യ ഒരു ക്ലിക്‍ ബയ്റ്റ് ആയി തത്ക്കാലം ഇവിടെ കിടക്കട്ടെ. അതു വിശദീകരിക്കുമ്പോൾ മറ്റേ ടീംസിനുള്ള (ഡിജിപി, എം.പി, പോൾ ഹൈലി) മറുപടി കൂടി ആകും.

നോവൽ-കൊറോണ വൈറസ് എന്ന് പേരിടുന്നത്തിന് മുൻപും, ഇപ്പൊൾ SARS-CoV2 എന്ന് വിളിക്കുന്നതുമായ ഈ വൈറസ് നവംബർ അവസാനത്തോടെ കൂടിയാണ് രംഗത്ത് എത്തുന്നത്. രോഗികളിൽ നിന്നും ശേഖരിച്ച വൈറസ് സാമ്പിളുകളുടെ ജീനോമിക്‍ സീക്വൻസിംഗ് നടത്തിയ ശാസ്ത്രജ്ഞർക്ക് മനസിലാക്കാൻ സാധിച്ചത് ഇതിന്റെ ഉത്ഭവം നവംബറിൽ ആണെന്നാണ്. രോഗത്തിന്റെ സഞ്ചാരപഥത്തിൽ വൈറസിന് പരിണാമപരമായ ജനിതകപരിവര്‍ത്തനങ്ങള്‍ (mutations) സംഭവിക്കുമെന്നതിനാൽ, അതിന്റെ ഘടനാപരമായ മാറ്റങ്ങളിൽ നിന്നും വൈറസിന്റെ പഴക്കം, അതിന്റെ കുടുംബത്തിലെ മറ്റു വൈറസുകളുമായി ഉള്ള സാമ്യം, വ്യത്യാസം എന്നിവ മനസ്സിലാക്കാൻ കഴിയും. വെറും ഫ്ലൂവല്ല, സ്വന്തമായി അസ്തിത്വം ഉള്ള ഒരു വൈറസ് ആണ് കോവിഡ്-19 അസുഖം പരത്തുന്നത് എന്നാണ് ഇതിലൂടെ മനസ്സിലാക്കാൻ സാധിച്ചത്. വൈറസ് മുപ്പത്തു ഡിഗ്രീ ചൂടില്‍ തട്ടി പോകുമോ എന്നൊക്കെ പറയാൻ ഇത് പ്രധാനമാണ്, വേറൊരു വൈറസ് തട്ടി പോയന്ന് കരുതി, ഇതിനും ആ ഗതി വരും എന്ന് പറയാൻ കഴിയില്ല.

വൈറസ് മൂലമുള്ള പകർച്ചവ്യാധിയുടെ ഗതി നിർണയിക്കുന്ന പ്രധാനഘടകങ്ങളിൽ ഒന്നാണ് അതിന്റെ റിപ്രൊഡക്ഷൻ നമ്പർ (Basic Reproduction Number - R0). പൊതുവിൽ രോഗസംക്രമത്തിനു സാധ്യതയുള്ള ജനതതിയില്‍, ഒരു രോഗബാധയില്‍ നിന്നും ശരാശരി എത്ര പേരിലേക്ക് രോഗം പരക്കാം എന്നാണ് ഇതു കണക്കാക്കുന്നത്. പല പകർച്ചവ്യാധികൾക്കും ഇത് വിഭിന്നമായിരിക്കും.

ഒരു രോഗത്തിന് R0 സ്ഥിരമായ മൂല്യം (constant) ഒന്നുമല്ല. പലപ്പോഴും അത് പാരിസ്ഥിതികാവസ്ഥകളും ജനതയുടെ പകർച്ചവ്യാധിയോട് ഉള്ള പ്രതികരണവുമായി ആശ്രയച്ചിരിക്കും. R0 ഒന്നിൽ കൂടുതലാണെങ്കില്‍, പകർച്ചവ്യാധി പൊട്ടിപ്പുറപ്പെടാനുള്ള സാധ്യത വർദ്ധിക്കും. ചൈനയിലെ കണക്കു വെച്ച് കോവിഡ്-19ന്റെ R0 വില 2.5 ആണ്‌. ഇതൊരു മതിപ്പുകണക്ക് (estimate) മാത്രമാണ്. ഒരു 1.5-3.0 സ്പ്രെഡ് ആയിരിക്കാം ആഗോളതലത്തില്‍.

ജനസംഖ്യയുടെ എത്ര ശതമാനം ഇത്തരത്തിൽ അസുഖം ബാധിക്കും എന്നു കണക്കു കൂട്ടുന്നത് (1- (1/RO)) എന്ന സൂത്രവാക്യം ഉപയോഗിച്ചാണ്. ഈ മാതൃക വെച്ചാണു ജനസംഖ്യയുടെ 60-70 ശതമാനത്തിന് കോവിഡ്-19 ബാധിക്കാം എന്ന് ജർമൻ ചാൻസലർ ആംഗല മേർകേൽ പറയുന്നത്. കേരളത്തിന്റെ ജനസംഖ്യ മൂന്നു കോടി എന്ന് കണക്കാക്കിയാൽ, ഇതൊരു പുതിയ തരം കൊറോണവൈറസ് ആയത് കൊണ്ടും, R0 2.5 എന്ന മൂല്യത്തിൽ, 1.8 കോടി മനുഷ്യരെ വരെ ബാധിക്കാം. അതിൽ പ്രതിപക്ഷനേതാവ്‌ പറഞ്ഞ മരണനിരക്ക് (2-3%) വെച്ചു നോക്കിയാൽ ഒരു 3-4 ലക്ഷം ആളുകൾ പെടും. 

വാസ്തവം പറഞ്ഞാല്‍, ഇത്രയും പേരെയൊന്നും രോഗം ബാധിക്കുവാന്‍ പോകുന്നില്ല. മേലെ പറഞ്ഞത് പ്രതിരോധപ്രവർത്തനങ്ങൾ ഒന്നും ഇല്ലാത്ത സാഹചര്യത്തിൽ ഉള്ള ഒരു മതിപ്പുകണക്കാണ്. കോവിഡ്-19ന്റെ Case fatality rate (CFR) 0.5% മുതൽ 1% വരെയാണെന്നാണ് കണക്കാക്കപ്പെടുന്നത്. പക്ഷേ അതിലെ തന്നെ ഏറ്റവും കൺസർവേറ്റീവ് എസ്റ്റിമേറ്റ് എടുത്താൽ പോലും ഫലം ഭീമാകാരമായിരിക്കും.

കോവിഡ്-19 ഇത്ര പരക്കുന്നതിനു മുൻപ്, പല നയകര്‍ത്താക്കളുടെയും ആശങ്കകൾ ഒരു ലോക്ക്ഡൗണ് ചെയ്യുന്നത് കൊണ്ട് ഉണ്ടായേക്കാവുന്ന സാമ്പത്തികനഷ്ടം ആയിരുന്നു. ഈ സാഹചര്യത്തിലാണ് അടിച്ചമര്‍ത്തല്‍ - ലഘൂകരണവൈരുദ്ധ്യം ഉടലെടുക്കുന്നത്.

1. കണ്ടയ്ൻമെന്റ്/അടിച്ചമർത്തൽ: #SARSCov2 പടരാതിരിക്കാൻ ശ്രമിക്കുക. രോഗസംക്രമം തടസ്സപ്പെടുത്തുകയും പുതിയ കേസുകളുടെ എണ്ണം കുറയ്ക്കുകയും ചെയ്യുക. അങ്ങനെ R0യുടെ വില ഒന്നോ അതിൽ കുറവോ ആക്കാൻ ശ്രമിക്കുക. അതാണ് ചൈന ചെയ്തത്.

2. മിറ്റിഗേഷൻ/ലഘൂകരണം: വ്യാപനം അനിവാര്യമാണെന്ന് അംഗീകരിക്കുക. പക്ഷേ അത് മന്ദഗതിയിലാക്കാനും ആഘാതം കുറയ്ക്കാനും ശ്രമിക്കുക. ഇതാണ് തുടക്കത്തിൽ അമേരിക്കയും യുകെയും ചെയ്യാൻ ശ്രമിച്ചത്.

വൈറസ്സിന്റെ പ്രയാണത്തെ തടയാൻ ലോക്ക്ഡൗണ് നടപടികൾ എടുക്കാത്ത സാഹചര്യത്തിൽ കേസുകൾ കുമിഞ്ഞു കൂടുകയും, ആരോഗ്യസംവിധാനങ്ങൾക്ക് കൈകാര്യം ചെയ്യാൻ കഴിയാത്ത നിലയിലേക്ക് കാര്യങ്ങൾ പോകും. അതുകൊണ്ട് ആരോഗ്യസംവിധാനങ്ങൾക്ക് അമിതഭാരം നൽകാതെ വൈറസിന്റെ വ്യാപനത്തെ മന്ദഗതിയിലാക്കുക എന്നതാണ് ലഘൂകരണതന്ത്രം ലക്ഷ്യം വെച്ചത്. എന്നാൽ പുതിയ പഠനങ്ങൾ വെളിവാക്കുന്നത് ലഘൂകരണതന്ത്രം അതിന്റെ ഉദ്ദേശലക്ഷ്യങ്ങൾ നേടിയെടുക്കുന്നതിൽ അപര്യാപ്തമാണെന്നാണ്. ഇതിന്റെ ഏറ്റവും മൂർത്തമായ ഉദാഹരണമാണ് യു.കെ. കോവിഡ്-19 പ്രതിരോധപ്രവർത്തങ്ങളിൽ കടുത്തനടപടികളിലേക്ക് പോകാതെ, വൈറസിനെ ജനങ്ങൾക്ക് ഇടയിലേക്ക് ഇറക്കി വിട്ട് herd immunity നേടിയടുക്കാം എന്ന് പറഞ്ഞ് തുടങ്ങിയ അഭിനവ ചർച്ചിൽ ബ്രിട്ടീഷ് പ്രധാനമന്ത്രി ബോറിസ് ജോണ്‍സണ്‍ അടക്കം മലക്കം മറിഞ്ഞു. അവസാനം പറഞ്ഞത് "പ്രിയപ്പെട്ടവർ പലരും കാലം തെറ്റി മരിക്കും” എന്നാണ്. അവിടെയും കണ്ടൈനമെന്റ് സമാനമായ ഒരുക്കങ്ങൾ തുടങ്ങി.

ഇതിന് വഴിവെച്ചത് ഇംപീരിയൽ കോളേജിലെ നീൽ ഫർഗൂസന്റെ നേതൃത്വത്തിൽ നടത്തിയ പഠനത്തിന്റെ അടിസ്ഥാനത്തിലാണ്. “Impact of non-pharmaceutical interventions (NPIs) to reduce COVID19 mortality and healthcare demand” എന്ന പേരിലുള്ള പഠനം മെറ്റിഗേഷൻ മാത്രം ഉപയോഗിച്ച് കോവിഡ്-19നെ നേരിടുന്നതിന്റെ അപര്യാപ്തതയെക്കുറിച്ചാണ്.

“Let me be clear: describing this as a pandemic does not mean that countries should give up. The idea that countries should shift from containment to mitigation is wrong and dangerous.”,

എന്നാണ് WHO യൂറോപ്പ് റീജിയണൽ ഡയറക്റ്റർ അഭിപ്രായപ്പെട്ടിരിക്കുന്നത്. ഈ സാഹചര്യത്തിൽ കേരളത്തിന്റെ പ്രതിപക്ഷനേതാവ് വീണ്ടും ലഘൂകരണത്തെക്കുറിച്ച് അദ്ദേഹത്തിന്റെ വാദങ്ങൾ മുന്നോട്ട് വെക്കുന്നത് ആശങ്കാജനകമാണ്.

യഥാർത്ഥത്തിൽ പ്രതിരോധപ്രവർത്തനത്തിൽ ഒരു കണ്ടയ്ൻമെന്റ്-മിറ്റിഗേഷൻ ഡൈകോട്ടമീ നിലനിൽക്കുന്നില്ല; രണ്ടും ആവശ്യമാണ്. ഇവിടെ പറയാൻ ശ്രമിച്ചത് അടിച്ചമർത്തൽ ഒഴിവാക്കിയുള്ള മിറ്റിഗേഷൻ രീതികളുടെ പരിമിതിയെകുറിച്ചാണ്. എന്നാൽ ഇന്ന് ആ സാഹചര്യം കഴിഞ്ഞു പോയിരിക്കുന്നു. കോവിഡ്-19 ബാധിച്ച രാജ്യങ്ങൾ പലതും ചൈനയുടെ മാതൃകയിൽ ലോക്ക്ഡൗണ് ചെയ്യാൻ നിർബന്ധിക്കപ്പെട്ടിരിക്കുന്നു. അമേരിക്കൻ പ്രസിഡന്റ് ട്രംപ് മാർച്ച് 9ന് റ്റ്വിറ്ററിൽ കുറിച്ചത് ഇങ്ങനെ ഫ്ലൂ പിടിച്ചു ഓരോ വർഷവും പതിനായിരങ്ങൾ മരിക്കുന്നുണ്ട് എന്നിട്ടും ഷട്ട് ഡൗൺ ഒന്നും ചെയ്യാറില്ല. ഈ പറഞ്ഞ ആൾ തന്നെ രണ്ടു ദിവസം കഴിഞ്ഞപ്പോൾ ഷട്ട് ഡൗൺ പരിപാടികൾ തുടങ്ങി, യൂറോപ്പിലേക്ക് ഉള്ള ഫ്ലൈറ്റുകൾ നിർത്തി. ഈ നില തുടര്‍ന്നാൽ അമേരിക്കയിൽ പല മെഡിക്കൽ സൗകര്യങ്ങളും റേഷനിങ് ആകുമെന്ന് അവർ ഭയപ്പെടുന്നു.അമേരിക്ക അടക്കം ഉള്ള സ്ഥലങ്ങളിൽ പലപ്പോഴും ടെസ്റ്റിങ് ഫലപ്രദമായി നടത്താന് കഴിയാത്ത സാഹചര്യത്തിലാണ് അവർ ട്രയജിങ് രീതിയിലേക്ക് മാറുന്നത്. അവിടെ പല സംസ്ഥാനങ്ങളിൽ ടെസ്റ്റിംഗ് ബാക്ക്ലോഗ് പ്രശ്നങ്ങൾ വരെയുണ്ട്.

ഗ്ലോബൽ കണക്റ്റിവിറ്റി ഗ്രാഫിലെ ഒരു ഹോട്ട്സ്പോട്ട് എന്ന നിലയിൽ കേരളത്തിൽ ഇത്തരം വൈറസുകൾ എത്താൻ സാധ്യത കൂടുതലാണ്. മലയാളി എത്താത്ത സ്ഥലങ്ങൾ ഇല്ല എന്ന് പറയുന്നത് വെറുതെയല്ല; ചൈനയിലെ വുഹാനിൽ ഒരു മലയാളിക്ക് ഹോട്ടൽ ഉണ്ടായിരുന്നു, അത് ഇപ്പോൾ അടഞ്ഞു കിടക്കുന്നു. ആദ്യ വേവ് കോവിഡ്-19 കേരളം വിജയകരമായി തരണം ചെയ്തു. ഒന്നാം റൗണ്ടിൽ കേരളം കമ്മ്യൂണിറ്റി സ്പ്രെഡ് ഒഴിവാക്കിയത് വലിയ നേട്ടമാണ്. നല്ലൊരു പങ്ക് രാജ്യങ്ങൾക്കും കഴിയാത്ത ഒരു നേട്ടമാണ്, അതും നമ്മളേക്കാൾ സമ്പത്തും സാങ്കേതികജ്ഞാനവുമുള്ള സമൂഹങ്ങൾ പരാജയപ്പെട്ട സാഹചര്യത്തിൽ. ഒന്നിലധികം പ്രഭവകേന്ദ്രങ്ങൾ ഉള്ളത് കൊണ്ട് തന്നെ, രണ്ടാം വേവ് കൂടുതൽ ബുദ്ധിമുട്ട് ഉണ്ടാക്കും. ഒരു സംസ്ഥാനം എന്ന നിലയിൽ പരിമിതികളുണ്ടെങ്കിലും പൊതുജനാരോഗ്യസംവിധാനം ശക്തമായി നിലനിൽക്കുന്ന നമ്മുടെ നാടിന് ഈ പ്രതിസന്ധിയേയും തരണം ചെയ്യും എന്നു പ്രതീക്ഷിക്കാം.

References: 

  1. “Impact of non-pharmaceutical interventions (NPIs) to reduce COVID19 mortality and healthcare demand”

  2. https://www.imperial.ac.uk/media/imperial-college/medicine/sph/ide/gida-fellowships/Imperial-College-COVID19-NPI-modelling-16-03-2020.pdf

  3. http://www.euro.who.int/en/health-topics/health-emergencies/coronavirus-covid-19/news/news/2020/3/who-announces-covid-19-outbreak-a-pandemic

  4. https://m.youtube.com/watch?v=hgS1iuMDaxI&feature=youtu.be

  5. https://twitter.com/vijayanpinarayi/status/1237993731732541440?s=19